Waarlik ’n fees van Oosterse seekos. Die steurgarnale word bedek met panko-krummels van Japan wat dit heerlik bros maak. Jy kan boonop alles buiten die steurgarnale in dieselfde pan gaarmaak.
genoeg vir 4
SALM
• 45 ml wit sesamsaad
• 4 salmfilette (sowat 500 g)
• grofgemaalde sout
• 20 ml kanola-olie
PAK CHOI
• 30 ml kanola-olie
• 6 baba- pak choi, gehalveer
• 30 ml donker sojasous
KAMMOSSELS
• 30 ml kanola-olie
• 10 kammossels
• 30 ml donker sojasous
NOEDELS
• 400 g noedels van jou keuse
• 30 ml kanola-olie
• ½ groen brandrissie, fyngekap
• ½ rooi brandrissie, fyngekap
• 1 knoffelhuisie, fyngekap
• 2 ml fyngekapte vars gemmer
• 30 ml donker sojasous
STEURGARNALE
• 2 eiers
• 500 g steurgarnale, skoongemaak, maar behou die stertjie
• 100 g panko-krummels
• 100 ml kanola-olie
SIT VOOR SAAM MET
• vars lemmetjies
• ligte sojasous
Verhit oond tot 100 °C. SALM Gooi sesamsaad op ’n bord. Druk elke salmfilet se vellose kant in die saad. Geur met sout. Verhit olie in pan en plaas salmfilette met velkant onder in pan. Braai tot vel bros is. Draai filette versigtig om. Braai tot sesamsaad goudbruin en bros is. Skep uit en hou warm in oond. PAK CHOI Verhit olie in dieselfde pan. Plaas pak choi in pan en voeg sojasous by. Braai tot sag en draai nou en dan om. Skep uit en hou warm in oond. KAMMOSSELS Verhit olie in dieselfde pan. Pak kammossels in pan en braai sowat 1 minuut. Draai om en braai nog sowat 2 minute.
Voeg sojasous by en braai nog ’n paar sekondes – maak seker al die kammossels is goed bedek met die sous. Skep uit en hou warm in oond. NOEDELS Kook noedels volgens aanwysing op pak en dreineer in vergiettes. Verhit olie in kammosselpan en voeg res van bestanddele by. Braai tot knoffel en brandrissies sag is en voeg gaar noedels by.
Roerbraai sowat 1 minuut tot al die noedels goed bedek is. Plaas in oond om warm te bly. STEURGARNALE Klits eiers in plat mengbakkie. Doop steurgarnale in eier en rol in krummels tot goed bedek. Verhit olie in diep pan en braai steurgarnale tot goudbruin en gaar. Rangskik al die seekos op opdienborde en sit voor met vars lemmetjies en die sojasous.
Salm, kammossels, steurgarnale en pak choi met noedels
The post Salm, kammossels, steurgarnale en pak choi met noedels appeared first on SARIE.