Vir die eerste episode van SARIE se splinternuwe kookprogram, Okkasie-inspirasie (Maandae om 18:30 op Via, DStv-kanaal 147), het kosredakteur Herman Lensing vir Surene Scheepers na sy huis genooi om vir haar ’n Spaanse kombuistee te help reël.
Surene hou van warm geure en helder kleure, en dis presies wat Herman op die spyskaart vir haar tapas-kuier gesit het.
![Screen Shot 2017-04-17 at 4.34.00 PM]()
Surene se spyskaart
• Tuisgemaakte wors – sonder ’n masjien!
• Spek-en-parmesaan-krokette
• Sjokolade-crema catalana
![Screen Shot 2017-04-17 at 4.33.40 PM]()
Tuisgemaakte wors – sonder ’n masjien!
genoeg vir 12 – 16
• 1 kg varkmaalvleis van goeie gehalte
• 100 ml yskoue witwyn
• 250 g spek, fyngekap
• 4 knoffelhuisies, fyngekap
• 45 ml gerookte paprika
• 20 ml cayenne-peper
• 5 ml fyn komyn
• 10 ml gedroogde origanum
• 10 ml sout
• varsgemaalde swartpeper
• 1 skoon derm (bestel by jou slagter), geweek in koue water
• olyfolie vir braai
Plaas maalvleis in mengbak. Voeg witwyn en spek by. Meng goed. Voeg knoffel, paprika, cayenne-peper, komyn, origanum en sout by. Meng goed. Geur met swartpeper. Sit ’n 1 cm-tuit sonder ’n patroon aan ’n spuitsak. Ryg soveel derm as wat jy kan op die tuit. Knip derm sowat 5 cm van die tuit af en knoop. Vul sak met maalvleismengsel. Druk mengsel versigtig maar so kompak as moontlik in die derm uit. Draai ná elke 4 cm van gevulde derm die worsie 6 – 8 keer in die rondte om te seël. Herhaal die proses tot die derm opgebruik is. Trek van die tuit af en knoop die punt weer stewig toe. (Jy kan sowat 4 worsies op een slag maak met ’n standaardgrootte tuit.) Moenie die worsies van mekaar losknip tot jy dit gebraai het nie. Herhaal die proses tot al die maalvleis opgebruik is. Verhit olyfolie in ’n pan en braai worsies sowat 3 – 5 minute per kant of tot goudbruin en gaar. Sit voor met mayonnaise van goeie gehalte.
![Screen Shot 2017-04-17 at 4.33.23 PM]()
Spek-en-parmesaan-krokette
genoeg vir 12 – 16
• 45 ml olyfolie
• 250 g spek, fyngekap
• 100 ml botter
• 45 ml koekmeel, plus ekstra om krokette in te rol
• 4 aartappels, gekook en fyngedruk
• 100 g parmesaan-kaas, fyngerasper
• sout en varsgemaalde swartpeper
• 2 eiers, liggies geklits
• 200 g fyn broodkrummels
• olie vir diepbraai
Verhit olyfolie in middelslag-pot. Voeg spek by en braai tot goudbruin. Skep uit pot. Smelt botter in dieselfde pot. Voeg die 45 ml meel by en roer tot gemeng. Hou aan met roer vir 2 – 3 minute of tot mengsel begin verbruin. Voeg aartappels by en meng goed. Verwyder van hitte en voeg parmesaan en gaar spek by. Meng goed. Geur met sout en swartpeper. Laat afkoel tot hanteerbaar. Skep eetlepels vol van die mengsel en rol in bolletjies. Rol elke bolletjie eers in koekmeel, dan in eier en laastens in broodkrummels. Verhit olie tot warm oor matige hitte. Braai bolletjies in warm olie vir 5 – 6 minute of tot goudbruin en bros. Dreineer en sit warm voor.
![Screen Shot 2017-04-17 at 4.33.51 PM]()
Sjokolade-crema catalana
genoeg vir 6 – 8
• 80 ml water
• 150 g (190 ml) suiker
• 250 ml melk
• 125 ml room
• 4 eiergele
• 2 eiers
• 60 ml kakaopoeier
• 5 ml vanieljegeursel
• 75 g (95 ml) suiker
• 8 sjokolade-macarons
• 125 g karamel-springmielies
Verhit oond tot 160 °C. Bring water en die 150 g suiker in ’n middelslag-pot tot kookpunt. Laat vinnig kook vir 8 – 10 minute tot goue karamel vorm. Spuit ’n broodpan van 10 x 15 cm met kleefwerende kossproei. Gooi warm karamel onderin broodpan en laat staan tot gestol.
Bring melk en room in ’n skoon pot tot kookpunt. Klits eiergele, eiers, kakao, vanieljegeursel en die 75 g suiker saam tot lig en romerig. Voeg warm melkmengsel by terwyl jy roer. Gooi hele mengsel deur ’n sif in die broodpan. Plaas broodpan in oondbak. Vul oondbak halfpad met warm water. Bedek broodpan met foelie en bak vir 50 – 60 minute of tot gestol soos jellie. Haal uit oond en laat afkoel. Sit in yskas tot koud.
Keer versigtig uit op opdienbord. Sit macarons en springmielies bo-op. Sit voor.
Kyk die voorskou hier:
Onthou, Okkasie-inspirasie is Maandae om 18:30 op Via (DStv-kanaal 147).
The post ’n Spaanse okkasie – al die resepte appeared first on SARIE.
