Melinda Botma van Langebaan is mal oor kuier, kook en oudhede restoureer. Sy wil ’n reunie hou vir skoolvriende wat sy lanklaas gesien het, en sy reken ’n anderste teeparty in die aand sal werk. Groot lampskerms wat bo vintage-tafels sweef  skep die atmosfeer. Teepotte vol wyn en vingerhappies sorg vir ’n kuier tot laat aand.

Melinda se spyskaart:

• Winkelhoender-springrolls
• Polenta-koekies
• Suurlemoen-meringuekoek

WINKELHOENDER-SPRING ROLLS

genoeg vir 10 rolletjies

• 1 gaar hoender, van die been af gevlok
• 10 ml vissous
• knippie strooisuiker
• 4 grasuie, fyngekap
• 30 ml oestersous
• hand vol spruite, gekap
• 1 klein wortel, gerasper
• 10 springroll velle
• 1 eierwit, effens geklits
• sowat  1L sonneblomolie, om die spring rolls in te braai.

Vlok die hoender van die been af. Meng al die bestanddele behalwe die fillodeeg en eierwit saam in ’n mengbak. Geur met sout en swartpeper. Plaas een vel deeg op jou werkvlak. Vorm ’n lang wors van die vleisvulsel en plaas dit aan die een kant van die deegstrook (daar moet sowat 3 cm spasie bo en aan die kante van die deeg wees). Verf die rand van die deeg reg rondom met eierwit. Vou die boonste rand oor die vleis en vou dan die twee lang sye om. Rol die deeg op sodat dit soos ’n sigaar lyk. Herhaal met die res. Verhit die olie in ’n diep pan tot warm. Die spring rolls moet taamlik stadig braai sodat die deeg gaar word. Braai tot goudbruin en dreineer op kombuispapier. Sit warm voor saam met doop sous van jou keuse.

POLENTA-KOEKIES

Die Franse maak ’n madeleine, ’n soet koekie wat jy saam met koffie kan eet. Hierdie is my sout weergawe met polenta.

genoeg vir 8

• 110 g fyn polenta
• 20 g (60 ml) koekmeel
• 5 ml koeksoda
• 100 g parmesaankaas, fyngerasper
• sout en varsgemaalde swartpeper
• 40 g (45 ml) botter, gesmelt
• 2 eiers
• 160 ml karringmelk
• 12 salie blare

Verhit oond tot 180 °C. Plaas polenta, meel, koeksoda, kaas, sout en peper in ’n mengbak. Voeg botter, eier en karringmelk by. Roer tot gladde mengsel. Spuit ’n bakplaat goed met kleefwerende kossproei – of as jy ’n pan met vlak holtes het, kan jy dit ook gebruik. Skep mengsel in spuitsak met 1 cm-tuit. Plaas salie op bakplaat en spuit 3 cm lange worsies op die plaat bo-op die blare. Bak vir 5 – 8 minute of tot goudbruin en bros. Sit louwarm voor.

SUURLEMOEN-MERINGUEKOEK

genoeg vir 1 koek

• 4 gekoopte vanielje sponskoeke
• 200 ml limoncello liqueur

Vir Suurlemoen-room

• 1 x 10 g-sakkie gelatien
• 30 ml koue water
• 300 ml suurlemoensap
• 120 g suiker
• 200 g botter, gesmelt
• 8 eiers, geskei
• 2 heel eiers
• 200 g strooisuiker

Maak suurlemoen-room: Week gelatien in koue water tot sponserig. Meng suurlemoensap, suiker, botter, eiergele en heel eiers saam. Plaas mengsel in skoon pot. Verhit oor lae hitte en roer met houtlepel tot mengsel dik en romerig is, sowat 10 – 15 minute.

Mengsel is reg as dit die agterkant van ’n houtlepel bedek. Voeg geweekte gelatien by, roer tot gesmelt en hou eenkant. Gebruik skerp mes en sny elke koek in twee lae. Sny bokant van koek reguit af indien dit skeef gerys het. Plaas losboompan se ring op bord, maak pan se kante hoër deur bakpapier in 3 lae om ring te draai en stewig vas te bind met kombuistou.

Plaas eerste laag koek onderin pan direk op bord. Sodra suurlemoen-mengsel dik en amper gestol is, maar steeds vloeibaar, gooi dun lagie bo-op koek. Plaas tweede koek bo-op en herhaal die lae tot al die koek opgebruik is. Plaas in yskas en laat stol. Klits eierwitte tot stywe punte vorm en gooi strooisuiker stadig by. Hou aan klits tot blink. Verwyder bakpapier en haal ring versigtig af. Skep meringue bo-op en brand bruin met kombuisblaasvlam. Sit voor.

The post ’n Fees vir ou vriende: Nostalgies en eksentriek appeared first on SARIE.

Zalta Kelbrick se okkasie is eenvoudig maar elegant. ’n Lang wit tafeldoek bedek die tafel waaroor fynbos in ’n bos hang. Proteas en houtbeeldjies versier die tafel.

Zalta se spyskaart:

• Vark-en okkerneut-terrien
• Lamsrol met Jerusalem-hoemoes
• Pavlova-koek met rooiwyn-pere

VARK-EN-OKKERNEUT-TERRIEN

Die maklikste terrien wat jy kan maak en dit is heerlik as voorgereg by enige maaltyd!

• 1 x 250 g-pakkie strepiespek
• 800 g varkmaalvleis
• 60 ml brandewyn
• 1 ui, fyngekap
• 15 ml botter
• 200 ml rooiwyn
• 250 g Kasselse varktjops, fyngesny
• 250 g hoenderlewers
• 1 takkie roosmaryn, fyngekap
• 6 salieblare, fyngekap
• 5 ml neutmuskaat
• sout en varsgemaalde swartpeper na smaak
• 100 g okkerneute
• 100 g droëappelkose fyngekap

Verhit die oond tot 180 °C. Voer ’n 35 x 10 cm-broodpan eers met kleefplastiek en dan in die breedte met repies spekvleis uit. Hou oorblywende repies eenkant. Plaas die res van die bestanddele, behalwe die neute en appels, in ’n voedselverwerker. Pols dit teen ’n hoë spoed tot ’n gladde mengsel. Meng die neute en appelkose by. Skep die mengsel in die uitgevoerde broodpan. As daar spek oor is, pak dit bo-op.

Bedek die pan met foelie en plaas dit in ’n oondbak wat met warm water gevul is. Plaas in die warm oond en bak 90 minute. Haal die terrien uit en laat dit in die waterbad afkoel. Plaas oornag in die yskas. Sit voor met basiliepesto en agurkies.

LAMSROL MET JERUSALEM-HOEMOES

• 350 g droë kekerertjies
• 45 ml olyfolie
• 2 uie, gekap
• 2 knoffelhuisies, gekap
• 2 wortels, in ringe gesny
• 4 stingels seldery, gekap
• 3 lourierblare
• 30 ml vinkelsaad
• 1 x 250 g-pakkie spek, gekap
• 1 ontbeende lamsblad, opgerol en met kombuistou vasgebind
• 2 x 400 g-blikke kersietamaties
• 250 ml beesaftreksel
• sout en varsgemaalde swartpeper

Jerusalem-Hoemoes

• 250 ml tahini-pasta
• 1 hand vol pietersielie, grofgekap
• 4 knoffelhuisies, gekap
• sap en skil van
• 2 suurlemoene
• 150 ml water
• goeie olyfolie vir voorsit

Aand voor die tyd: Verhit die oond tot 100 °C. Bedek die kekerertjies met koue water en laat oornag week. (Ja, ek weet dis moeite maar, glo my, jy gaan die verskil proe!) Verwarm die olyfolie in ’n groot pot. Voeg die uie, knoffel, wortels, seldery en lourierblare by en roerbraai 5 minute. Voeg die vinkelsaad en spek by en braai nog 5–8 minute of tot die spek begin verbruin. Plaas die lamsrol bo-op die groente. Voeg die tamaties en aftreksel by, geur baie goed met sout en peper, maak die pot toe en bak die rol oornag of sowat 8 uur lank in die louwarm oond

Volgende dag: Dreineer die geweekte kekerertjies, plaas dit in ’n skoon pot en geur met 5 ml sout. Bedek met water, bring tot kookpunt en kook sowat 30 minute tot sag. Dreineer en laat afkoel. Plaas die gaar kekerertjies saam met die tahini, pietersielie, knoffel en suurlemoensap en -skil in ’n voedselverwerker. Gooi die 150 ml water by en pols teen ’n hoë spoed tot ’n mooi gladde puree. Geur baie goed met sout en peper. Hou eenkant. Haal die vleisrol uit die pot, knip die toue los en breek die vleis in groot stukke. Skep die hoemoes op ’n groot opdienbord en smeer dit plat. Plaas die vleisstukke bo-op, skep die potsous oor en besprinkel met olyfolie. Sit voor met warm pitabrood.

PAVLOVA-KOEK MET ROOIWYN-PERE

• 8 eierwitte
• 250 g strooisuiker
• 200 g versiersuiker, gesif
• 25 g mielieblom, gesif

Klits die eierwitte tot sagte punte vorm en klits die strooisuiker bietjie vir bietjie by totdat die mengsel styf is. Vou die versiersuiker en mielieblom versigtig in die meringue in. Voer ’n bakplaat met gesmeerde bakpapier uit. Trek 2 groot sirkels op die bakpapier en vul ’n spuitsak met die meringuemengsel. Spuit dan die buitekant van die sirkels met die meringue en skep daarna lepelsvol meringue in die binnekant om dit op te vul. Bak teen 120 ˚C vir 3 uur totdat die meringue heeltemal droog is. Laat heeltemal koud word in die oond.

Rooiwyn-pere

• 6 pere
• 1 bottel rooiwyn
• 110 g suiker
• 1 kaneelstok
• 2 ster-anys
• skil van een lemoen en suurlemoen
• 25 ml mielieblom

Skil die pere – hou die stingels aan – en plaas in water met ’n bietjie sout. Meng die mielieblom met ’n bietjie rooiwyn om ’n dun pasta te vorm. Bring die res van die rooiwyn, suiker, kaneel, ster-anys en skil in ’n groot kastrol tot kookpunt. Roer tot al die suiker opgelos is. Plaas die pere heel in die rooiwyn, bedek en laat kook vir ongeveer 25 minute tot sag (draai die pere nou en dan om).

Verwyder die pere uit die stroop en gooi die sous deur ’n sif. Gooi die sous terug in die kastrol. Voeg die mielieblom-mengsel by en kook stadig tot verdik. Gooi sous oor die pere en laat koud word. Om die pavlova bymekaar te sit klits 1 liter room styf.

Plaas die helfte van die geklitste room bo-op een meringue-sirkel. Plaas die ander meringue bo-op en skep die orige room oor. Sny die rooiwyn-pere in skywe en rangskik bo-op. Bedruip die pavlova met van die stroop.

Kyk voorskou hier:

The post ’n Fees vir herfs: Minimalisties en elegant appeared first on SARIE.

Lindy van Tonder het onlangs in Thailand gaan vakansie hou. Sy wil graag die kleure en geure van die land met haar vriende deel. Kleurvolle orgidieë bedek die tafel en bakkies vol reukwater skep ’n Thaise gevoel. 

Lindy van Tonder se spyskaart:

• Steurgarnaalrolletjies
• Heelvis gebak met groenkerrie
• Pannekoek met karamelsous

STEURGARNAAL ROLLETJIES

Moenie dink hierdie resep is moeilik of vreemd nie – dis baie gesond en makliker as wat jy dink!

• 12 velle ryspapier
• 30 ml olyfolie
• 500 g steurgarnale, doppe verwyder en skoongemaak
• sout en varsgemaalde swartpeper na smaak
• 1 wortel, in stokkies gesny
• 10 cm-stuk komkommer, in repe gesny
• hand vol koljanderblare, fyngekap

Vir doopsous

• 1 knoffelhuisie, fyngekap
• 3 cm vars gemmer, skoongemaak en fyngerasper
• 15 ml brandrissiesous
• 15 ml vissous
• 60 ml sojasous

Verhit sowat 30 ml olyf olie in ’n pan en braai die steurgarnale vir 5 minute aan weerskante tot gaar. Geur met sout en peper na smaak. Laat eenkant afkoel tot benodig. Plaas ’n vel ryspapier op ’n skoon werkvlak. Besprinkel met water en smeer met jou vingers oor papiervel.

Draai om en herhaal proses aan ander kant. Pak steurgarnale, wortel, komkommer en koljander op ryspapier, maar los ’n rand van sowat 3 cm aan een kant. Vou dié rand bo-oor bestanddele. Vou dan die buitenste twee punte na binne en rol stewig op. Plaas onder ’n klam doek tot later benodig. Plaas al die bestanddele van die sous in ’n klein mengbakkie en roer goed met ’n teelepel. Pak die rolletjies op ’n opdienbord en sit voor met doopsous.

HEELVIS GEBAK MET GROENKERRIE

• 1 heel vis soos forel of salmon
• 30ml olyfolie
• 1 ui, gekap
• 2 knoffelhuisies
• 1 sakkie (80 g) Thaise groenkerriepasta
• 1 blik (400 ml) klappermelk
• 1 groenbrandrissie, gekap
• 1 hand vol vars koljander, gekap
• sout en varsgemaalde swartpeper
• wit rys vir voorsit

Verhit olyfolie in ’n pot en braai ui en knoffel tot goudbruin – so 5 minute. Voeg kerriepasta by en braai vir 3 minute. Gooi klappermelk by en verlaag die temperatuur. Laat stadig kook vir so 10 minute of tot geurige sous vorm. Roer brandrissie en koljander by.

Plaas vis op bakplaat en gooi sous oor. Plaas in warm oond en bak vir 20-25 minute of tot goudbruin en gaar. Geur goed met sout en swartpeper net voordat jy dit met rys voorsit.

PANNEKOEK MET KARAMELSOUS

genoeg vir 24 pannekoek

• 1 liter melk
• 6 eiers
• 20 ml sonneblomolie
• 10 ml vanieljegeursel
• 200 g (250 ml) suiker
• 420 g (750 ml) koekmeel
• 2 ml sout
• 5 ml neutmuskaat
• ekstra sonneblomolie vir braai
• 200 g bessies van jou keuse

Karamelsous

• 1 x 360 g-blikkie karamelkondensmelk
• 80 ml melk
• 85 g fudge, fyngekap (opsioneel)

Klits melk, eiers, olie, vanielje en suiker saam in ’n middelslag-mengbak. Sif meel, sout en neutmuskaat by en meng tot gladde beslag. Laat rus vir 10 minute in yskas. Verhit ’n klein bietjie olie in ’n braaipan tot warm. Bedek bodem van pan met ’n dun lagie beslag en braai sowat 30 sekondes per kant tot goudbruin en gaar.

Vir die karamelsous, plaas karamel en melk saam in ’n middelslag-pot oor matige hitte. Klits met draadklitser tot loperige, gladde mengsel. Voeg fudge by, indien jy dit gebruik. Sit pannekoek voor met karamelsous en piesang.

Kyk die voorskou hier:

The post ’n Thaise fees: Kleurvol en geurig appeared first on SARIE.

Die groente word in die oond gebak – die een helfte word vir die sous verpulp en die ander helfte sorg vir tekstuur in die pasta.

genoeg vir 4

• 1 kg botterskorsie-stukke
• 60 ml olyfolie
• 20 ml geroosterde masala
• 2 brandrissies, gekap
• 20 ml heel komynsaad
• sout en varsgemaalde swartpeper
• 400 g pasta van jou keuse
• 250 ml volroom-melk
• hand vol Italiaanse pietersielie, gekap

Verhit oond tot 200 °C. Plaas botterskorsie op oondbraaiplaat en sprinkel olyfolie oor. Sprinkel masala, brandrissie en komyn oor. Geur goed met sout en peper. Plaas in oond en bak 20 minute of tot botterskorsie sag en gaar is. Terwyl botterskorsie bak, kook pasta volgens aanwysings op pak. Verwyder botterskorsie uit oond en hou een helfte eenkant. Verpulp ander helfte saam met die melk tot romerige sous vorm. Voeg pietersielie by. Dreineer pasta en voeg heel botterskorsie-stukke en sous by pasta. Geur goed en meng deur. Garneer met vars basilie en vinkel. Sit warm voor.

The post Botterskorsie-pasta appeared first on SARIE.

Maak soos die Amerikaners en braai hoender bros met ’n karringmelk-krummelkors. Dis heerlik op hamburgers.

genoeg vir 4

• 12 ontbeende hoenderdye
• 45 ml gerookte paprika
• 250 ml karringmelk
• 2 knoffelhuisies, fyngekap
• sout en varsgemaalde swartpeper
• 200 g droë broodkrummels
• 70 g (125 ml) koekmeel
• 2 eiers, geklits
• sonneblomolie vir diepbraai
• 300 g gesnipperde kool
• 1 x 400 g-houer mayonnaise
• 4 broodrolletjies, gehalveer

Plaas hoender in groot bak. Meng paprika, karringmelk en knoffel. Gooi oor hoenderstukke en maak seker dis rondom bedek. Geur goed met sout en peper. Haal hoender uit mengsel en krap die meeste van die karringmelk af. Plaas broodkrummels en koekmeel in groot plastieksak. Doop hoenderstukke in geklitste eier en gooi in sak met krummels. Skud sak rond tot al die stukke goed bedek is met die krummels. Verhit olie vir diepbraai tot medium-warm in groot pot. Braai hoender 10–12 minute of tot goudbruin en bros. Dreineer en hou eenkant. Meng kool en ⅔ van mayonnaise. Geur met sout en peper. Smeer oorblywende mayonnaise op broodrolletjies. Verdeel koolslaai tussen rolletjies se onderste helftes. Skep hoender bo-op en bedek met boonste helftes. Sit warm voor.

The post Broshoender-hamburgers appeared first on SARIE.

As jy tamaties oondbraai, raak die smaak soeter en skerper. Met min moeite kan jy groot geure skep.

Genoeg vir 4

• 1 kg gemengde kersietamaties
• 250 g gekapte spek
• 2 knoffelhuisies, gekap
• 60 ml olyfolie
• 40 ml witwyn-asyn
• 4 takkies tiemie, gekap
• sout en varsgemaalde swartpeper
• 500 g spaghetti
• 4 wiele fetakaas
• 1 brandrissie, gekap
• hand vol Italiaanse pietersielie, gekap
• hand vol basiliekruid

Verhit oond tot 180 °C. Pak tamaties, spek en knoffel in oondbraaibak. Sprinkel olyfolie, asyn en tiemie oor. Geur goed met sout en peper. Oondbraai 20 minute of tot tamaties begin oopbars. Kook intussen spaghetti volgens aanwysings op pak en dreineer. Plaas in groot opdienbak en gooi warm tamaties en al die pansous oor. Krummel feta oor en voeg brandrissie by. Voeg pietersielie by en meng deur. Sit warm voor met basiliekruid.

The post Oondgebakte-tamatie-en-spekpasta appeared first on SARIE.

Jy braai die mielies en maak dan kerrie daarmee.

genoeg vir 6

• 30 ml olyfolie
• 1 ui, fyngekap
• 2 knoffelhuisies, fyngekap
• 20 ml masala
• 20 ml borrie
• 45 ml kerriepoeier
• 18 ontbeende hoenderdye, in blokkies gesny
• 1 x 400 ml-blik klappermelk
• 4 mielies
• 1 hand vol vars koljander, fyngekap
• sout en varsgemaalde swartpeper

Verhit olyfolie in ’n middelslagpot tot warm. Voeg ui en knoffel by. Braai 5 minute tot goudbruin. Voeg masala, borrie en kerriepoeier by. Braai nog 3 minute. Voeg hoender by en braai 5 minute of tot vleis begin verkleur. Gooi klappermelk by en verlaag hitte. Laat stadig prut vir 20 – 25 minute. Terwyl kerrie prut, verhit riffelpan tot warm en braai mielies tot goudbruin reg rondom – sowat 5 – 8 minute. Roer koljander en mieliepitte by gaar kerrie en geur goed met sout en peper. Sit warm voor.

The post Mielie-en-hoenderkerrie appeared first on SARIE.

Die vleis maak jy oornag gaar en sit dit dan in broodrolletjies voor. Jy kan natuurlik jou eie rolletjies vars bak as jy tyd het.

genoeg vir 6

• 60 ml olyfolie
• 1,25 kg ontbeende varkboud
• 2 uie, gekap
• 3 knoffelhuisies, gekap
• 200 g tamatiepasta
• 1 x 400 g-blik tamaties
• 750 ml rooiwyn
• 45 ml gerookte paprika
• 1 hand vol origanum, gekap
• sout en varsgemaalde swartpeper
• 6 broodrolletjies
• 2 tamaties, in skywe gesny

Verhit oond tot 110 °C. Verhit olyfolie in ’n middelslagpot. Plaas varkboud velkant na onder in pot en braai sowat 5 – 8 minute tot goudbruin. Haal uit pot. Voeg uie en knoffel by en braai sowat 3 – 5 minute tot goudbruin. Sit varkboud terug in pot. Voeg tamatiepasta, tamaties, rooiwyn, paprika en origanum by. Geur goed met sout en swartpeper. Bring tot kookpunt en haal van plaat af. Bedek pot met deksel en plaas oornag in warm oond – sowat 8 uur. Verwyder gaar boud uit sous. Gebruik dan ’n vurk en trek varkvleis in growwe stukke. Gooi ’n klein bietjie van die potsous by die vleis tot die mengsel lekker klam is. Sny rolletjies oorlangs oop en pak skywe tamatie daarin. Skep vleis in elke broodjie en sit voor met mielie-salsa (sien wenk).

Wenk

MAAK SALSA SÓ Kook 2 mielies tot gaar en braai bruin in warm riffelpan. Sny pitte los met skerp mes en meng met 1 hand vol gekapte koljander en 1 gekapte rooi-ui. Drup sap van 1 suurlemoen oor en geur goed met sout en peper

The post Rafelvark-rolletjies appeared first on SARIE.

Die lekker van dié kerrie lê in die sous waarin die frikkadelle gaargemaak word. Neem jou tyd met die sous.

genoeg vir 6

SOUS

• 45 ml olyfolie
• 1 ui, fyngekap
• 30 ml vinkelsaad
• 30 ml rissievlokkies
• 45 ml gerookte masala
• 20 ml borrie
• 2 lourierblare
• 2 x 410 g-blikke
• klappermelk
• 1 x 410 g-blik gekapte tamaties
• 1 hand vol koljander, fyngekap
• sout en varsgemaalde swartpeper

FRIKKADELLE

• 500 g maer maalvleis
• 1 ui, fyngekap
• 2 knoffelhuisies, fyngekap
• 1 cm vars gemmer, fyngerasper
• 15 ml fyn koljander
• 5 ml fyn kaneel
• 15 ml fyn komyn
• 2 eiers
• 100 g fyn broodkrummels

Sous

Verhit olyfolie in groot braaipan tot warm. Voeg ui, vinkelsaad en rissievlokkies by. Roerbraai vir 5 minute of tot uie begin verbruin – as dit lyk of die speserye begin brand, gooi ’n bietjie water by. Voeg res van speserye vir die sous by en roerbraai verder vir nog 5 minute of tot mengsel geurig is. Gooi klappermelk en tamaties by. Meng deur. Verlaag hitte en laat stadig prut vir 20 – 25 minute of tot dik, romerige sous vorm. Roer vars koljander deur. Geur goed met sout en peper. Hou eenkant.

Frikkadelle

Verhit oond tot 180 °C. Meng al die bestanddele en geur goed. Verdeel mengsel in 16 frikkadelle. Pak frikkadelle in oondbak en gooi kerriesous oor. Bak vir 25 – 30 minute of tot frikkadelle gaar is en begin verbruin. Sit voor met geelrys.

Geelrys, opgetof

Gee dit ekstra smaak met amandelvlokkies.

genoeg vir 6 – 8

• 500 ml basmati-rys
• 1 000 ml water
• 45 ml borrie
• 5 ml sout
• 10 ml suiker
• 1 x 250 g-pakkie rosyne
• 100 g amandelvlokkies
• 1 hand vol koljander, fyngekap

Plaas rys, water, borrie, sout en suiker in groot pot. Bring tot kookpunt en verlaag hitte. Laat stadig prut tot rys sag en gaar is, sowat 15 – 20 minute. Gooi nog water by indien nodig. Voeg rosyne, amandels en koljander by. Meng deur. Sit voor saam met kerrie.

The post Frikkadel-kerrie met geelrys appeared first on SARIE.

As jy ooit vir Sondagmiddagete opdaag by Borcherdstraat op Upington, kan jy maar weet my ma se pampoenkoekies sal op die tafel wees. Ek gee die karamel ’n moderne smaak met miso-pasta, ’n Oosterse bestanddeel gemaak van gefermenteerde sojabone. Laat dit uit as jy dit nie kry nie.

genoeg vir 12 koekies

• 480 g (500 ml) gaar pampoen
• 280 g (500 ml) koekmeel
• 20 ml bakpoeier
• 2 eiers
• 10 ml anyssaad
• sout en varsgemaalde swartpeper
• sonneblomolie vir diepbraai
• 100 g kaneelsuiker

KARAMELSOUS

• 200 g (250 ml) suiker
• 75 g (80 ml) botter
• 100 ml water
• 250 ml room
• 10 ml miso-pasta (opsioneel)

Druk pampoen fyn met aartappeldrukker. Voeg koekmeel, bakpoeier, eiers en anys by. Meng deeglik met houtlepel. Geur goed met sout en peper. Verhit olie vir diepbraai in groot pot – die olie moet minstens 10 cm diep wees. Moenie olie te warm maak nie. Gebruik ’n roomyslepel, doop dit in die warm olie en skep ’n lepel vol pampoenbeslag. Laat dit uit die roomyslepel in die olie val. Hou aan tot die pot se oppervlak vol is. Plaas deksel op pot en braai 5 minute. Maak pot oop en draai balle om. Plaas weer deksel op pot. Herhaal tot al die koekies goudbruin en gaar is (dit sal sowat 15 minute duur). Stel plaat se temperatuur laer as die olie te warm raak, anders gaan balle brand voor dit gaar is binne. Dreineer op handdoekpapier en rol in kaneelsuiker.

KARAMELSOUS

Plaas suiker, botter en water in middelslag-pot. Bring tot kookpunt en roer oor lae hitte met houtlepel tot suiker gesmelt het. Verhoog hitte en kook tot goue karamel vorm, 8–10 minute. Voeg room en miso by. Meng en bring weer tot kookpunt. Laat sous afkoel tot louwarm en gooi oor koekies. Sit voor.

The post Herman se ma se pampoenkoekies met miso-karamel appeared first on SARIE.

Tradisioneel word die gereg net met koffie gegeur. Ek gee dit ’n nuwe smaak met karamel, die geur van 2017!

Karamel-en-koffietiramisu

genoeg vir 8

6 eiergele
100 g strooisuiker
10 ml vanieljegeursel
100 ml soetwyn soos hanepoot
2 x 250 g-bakkies mascarpone, by kamertemperatuur
250 ml room
200 ml baie sterk koffie, by kamertemperatuur
30 vingerbeskuitjies
250 ml karamelsous (sien wenk)
100 g donkersjokolade
kakao vir oorsif

FOTO Donna Lewis

Metode

Bring pot met water tot kookpunt en verlaag hitte tot stadige prut. Plaas eiergele, suiker, vanielje en helfte van wyn saam in mengbak wat oor pot sal pas. Klits mengsel oor warm water met elektriese klitser tot eiers lig en skuimerig is, 8-10 minute. Verwyder van hitte en hou aan klits tot mengsel koud is. Terwyl menger loop, skep mascarpone lepel vir lepel by eiermengsel en klits tot glad. Hou eenkant. Klits room tot sagte punte vorm en vou by eiermengsel in. Meng koffie en res van wyn. Doop beskuitjies vinnig in koffiemengsel en pak ’n laag in bak met ’n deursnee van 30 cm en sowat 3 cm diep. Skep helfte van karamelsous oor, gevolg deur helfte van mascarponemengsel. Smeer gelyk. Rasper sjokolade oor en pak nog ’n laag beskuitjies bo-op wat gedoop is in koffie, asook res van karamel. Rond af met oorblywende mascarponemengsel. Plaas in yskas vir 4 uur. Sif kakao oor en sit voor.

Wenk: Maak karamel só

Gooi 200 g suiker in ’n pot en voeg 100 ml water by. Roer tot opgelos. Bring tot kookpunt en kook tot goue karamel vorm – sowat 10 minute. Verwyder pot van hitte en voeg 50 g botter by. Beweeg pot stadig in die rondte totdat al die botter gesmelt het. Voeg 125 ml room by en meng met ’n draadklitser tot glad. Laat afkoel.

The post Wintertroos: Karamel-en-koffietiramisu appeared first on SARIE.

Sy was een van Hollywood se styl-ikone. Maar het jy geweet Audrey Hepburn was ook ’n bobaas-kok? SARIE se Herman Lensing het ’n paar resepte uit die boek Audrey at Home, wat deur haar seun, Luca Dotti, geskryf is, gekies en as inspirasie vir sy eie geregte gebruik. Dit lyk hemels!

In die boek beskryf Luca sy ma só: “Die wêreld het haar geken in Givenchy en Valentino, maar sy was op haar gelukkigste in jeans en ’n T-hemp, en in die kombuis.”

Penne alla vodka

Dit was Audrey se gunstelingpasta! Sit aan en proe self, dit sal joune ook word …

FOTO Donna Lewis

genoeg vir 6

• 3 rooi soetrissies
• 45 ml olyfolie, plus ekstra vir braai
• 1 ui, gekap
• 2 knoffelhuisies, fyngedruk
• 12 tamaties, in kwarte gesny
• 30 ml gerookte paprika
• 125 ml vodka
• 3 klein rooi “bird’s eye”-brandrissies, gekap
• 1 hand vol vars koljander, gekap
• sout en varsgemaalde swartpeper
• 500 g penne-pasta
• parmesaankaas en basiliekruid, om voor te sit

Smeer soetrissies met olyfolie en plaas op bakplaat onder baie warm oondrooster, of gebruik ’n lang vurk en hou dit oor ’n oop gasvlam. Braai so vir 5-10 minute terwyl jy die soetrissie heeltyd draai. Braai tot pikswart geskroei. Plaas in bak, bedek met kleefplastiek en laat vir 5 minute sweet. Krap swart skille met skerp mes af. Sny en krap pitte uit.

Verhit nog olie in ’n middelslagpot. Voeg ui en knoffel by. Braai vir 5 minute of tot ui begin verbruin. Voeg gaar soetrissie, tamatie, paprika, vodka en brandrissie by. Verlaag hitte en laat prut vir 15-20 minute of tot tamatie sag en pap is. Voeg koljander by en geur goed met sout en peper. Maak met staafmenger fyn tot gladde mengsel. Kook penne volgens aanwysings op pak en dreineer. Voeg by warm sous. Plaas op opdienbord en sit voor met parmesaankaas en basiliekruid.

Pere in vonkelwyn

Audrey het dié pere in rooiwyn geposjeer, maar ek verkies ’n ligter opsie met vonkelwyn.

FOTO Donna Lewis

genoeg vir 6

• 800 g (1 liter) suiker
• 750 ml droë vonkelwyn
• 500 ml water
• 5 ml vanieljegeursel
• 3 steranyse
• 12 pere, geskil

Plaas suiker, vonkelwyn, water, vanielje en steranyse in groot pot en bring tot kookpunt. Verlaag hitte totdat die mengsel prut en pak pere in stroop. Sit deksel op en posjeer vir 10-15 minute of tot pere sag maar steeds ferm is. Verwyder van hitte en haal pere uit warm stroop om te keer dat pere nog sagter raak. Moenie die stroop weggooi nie. Laat alles afkoel. Sit pere voor in groot opdienbak met stroop en balle roomys.

Verwerk uit Audrey at Home: Memories of My Mother’s Kitchen deur Luca Dotti (Harper-Collins, R580)

The post Eet soos Audrey Hepburn appeared first on SARIE.

Wintertyd in my ouma se kombuis kon jy gereeld hoor hoe die pot se deksel klap terwyl die poeding stoom.

genoeg vir 6 – 8

• 250 g (270 ml) botter
• 250 ml gouestroop
• 200 g (250 ml) strooisuiker
• 4 eiers
• 420 g (750 ml) bruismeel
• 1 x 410 g-blik koejawels, gedreineer en fyngesny
• 1 x 400 g-blik karamelkondensmelk, geklits

VLA

• 300 ml melk
• 2 sakkies rooibostee
• 3 eiergele
• 150 g (170 ml) suiker

Klop botter, stroop en strooisuiker saam tot romerig. Voeg eiers een vir een by en klits elke keer goed. Roer meel en melk by. Voeg koejawels en kondensmelk by en meng. Spuit ’n 1 liter-keramiek- of emaljebak met kleefwerende kossproei. Skep die mengsel in die bak en smeer die bokant gelyk. Vou die bak in ’n moeseliendoek toe en maak ’n losserige knoop aan die bokant. Plaas die bak in ’n groot pot. Gooi kookwater in die pot tot by die halfpadmerk van die bak. Kook 2 uur oor matige hitte met die deksel op of tot ’n toetspen skoon uitkom. Vul die water so elke halfuur aan indien nodig. Maak solank die vla Bring melk en rooibostee tot kookpunt. Verwyder van hitte en laat staan vir 1 uur om te trek. Gooi mengsel deur ’n sif. Klits eiergele en suiker saam tot lig en romerig. Gooi rooibosmelk by en roer tot gemeng. Kook oor lae hitte tot mengsel die agterkant van ’n lepel bedek. Keer poeding uit op opdienbord en sit voor met vla.

The post Gouestroop-en-koejawelpoeding met rooibosvla appeared first on SARIE.

Ek is mal oor ’n bakkie yskoue roomys met vuurwarm sjokoladesous oor in die winter. Dis die beste troos wat jy kan kry.

genoeg vir 6

• 30 ml gelatien
• 125 ml koue water
• 420 g (500 ml) strooisuiker
• 125 ml kookwater
• 5 ml vanieljegeursel
• 250 ml room
• 1 vanieljepeul, oopgesny en saadjies, uitgekrap
• 300 g donkersjokolade
• 2 liter vanieljeroomys
• 250 ml melk
• 100 g fyn klapper

Week gelatien in koue water vir 5 minute. Plaas glasbak dan oor ’n pot met kookwater tot gesmelt. Plaas in elektriese menger se bak saam met strooisuiker, kookwater en vanieljegeursel. Klits by hoë spoed vir 10 minute of tot dik mengsel vorm. Gooi mengsel op ’n bakplaat van 30 x 20 cm wat goed met kleefwerende kossproei gespuit is. Laat stol vir 2 – 3 uur in yskas. Keer uit op kapplank en sny malvalekkers in blokke van 2 x 2 cm. Bring room en vanieljesade tot kookpunt en gooi sjokolade by. Roer tot gladde mengsel met draadklitser en hou warm. Plaas roomys en melk in voedselverwerker en klits by hoë spoed tot gladde mengsel. Gebruik kombuisblaasvlam en brand malvalekkers goudbruin. Sprinkel klapper oor. Skep roomysmengsel in glase. Pak malvalekkers bo-op en gooi warm sjokolade oor. Sit voor.

The post S’mores-melkskommels appeared first on SARIE.

Ons gee die Britte se luukse weergawe van broodpoeding ’n Afrika-geur met koffie uit Ethiopië.

genoeg vir 6

• 500 ml melk
• 500 ml room
• 400 g (500 ml) strooisuiker
• 100 ml koffie
• 200 g (sowat 12 snye) vars witbroodkrummels
• 8 eiers, geskei
• 200 g aarbeikonfyt

Verhit oond tot 180 °C. Bring melk, room, 200 g strooisuiker en koffie tot kookpunt. Voeg broodkrummels by en laat stadig prut vir 5 minute. Haal van plaat af en klits eiergele een vir een by. Gooi in oondvaste bak met ’n volume van sowat 1 500 ml. Plaas op bakplaat en bak vir 20 – 25 minute of tot dit gestol is en begin verbruin. Haal uit oond en skep aarbeikonfyt bo-op. Klits eierwitte met ’n elektriese klitser tot sagte punte vorm. Voeg res van strooisuiker geleidelik by en hou aan klits tot blink en styf. Skep lepels vol van die meringue bo-op aarbeikonfyt. Plaas terug in die oond en bak verder tot meringue goudbruin verkleur, sowat 10 minute. Sit warm voor.

The post Koningin van poedings appeared first on SARIE.

’n Maklike nagereg sonder te veel moeite.

genoeg vir 6 – 8

• 45 ml botter
• 100 g (125 ml) bruinsuiker
• 6 pere, gehalveer en stronk uitgesny

SOETWYNVLA

• 8 eiergele
• 250 ml muskadel
• 50 g (60 ml) strooisuiker
• 8 vars vye, oorlangs gehalveer

Verhit botter tot warm in braaipan. Gooi bruinsuiker by en skud pan liggies rond tot suiker gesmelt is. Pak pere met gesnyde kante na onder in warm suiker en braai vir 5 – 8 minute of tot gekaramelliseer. Hou eenkant. Soetwynvla Meng die eiergele, muskadel en strooisuiker in ’n groot glasbak. Plaas die bak op ’n pot met kokende water (die water moenie aan die boom van die bak raak nie) en klits die mengsel met ’n elektriese handklitser tot dik skuim vorm. Hou aan klits tot die mengsel warm voel wanneer jy jou vinger daarin druk, sowat 8 – 12 minute. Moenie die mengsel te warm laat word nie, anders skif dit. Haal die bak van die pot af en hou aan klits tot die mengsel heeltemal afgekoel het. Plaas vye en pere in opdienbak en gooi warm vla oor. Sit voor.

The post Gekaramelliseerde vrugte met soetwynvla appeared first on SARIE.

Rys is ’n goedkoop en lekker manier om ’n klomp mense kos te gee.

genoeg vir 6

• 30 ml olyfolie
• 1 ui, fyngekap
• 2 knoffelhuisies, fyngekap
• 100 g chorizowors
• 24 mossels, skoongemaak
• 1 koppie (250 ml) basmati-rys
• 500 ml hoenderaftreksel
• 200 g bevrore ertjies
• sout en varsgemaalde swartpeper

Verhit olyfolie in middelslagpot. Voeg ui, knoffel en wors by. Braai 5 – 8 minute of tot begin verbruin. Voeg mossels en rys by en braai 2 minute. Gooi aftreksel oor en verlaag hitte. Laat stadig prut vir 15 – 20 minute of tot die rys gaar is. Roer ertjies by en bring weer tot kookpunt. Geur goed met sout en swartpeper. Sit warm voor.

The post Geurige seekos-rys appeared first on SARIE.

In Marokko word hoender gaargemaak in ’n tagine, waarin die vleis stadig gekook word vir ’n heerlike geurige gereg. Ons doen dit só.

genoeg vir 6

• 5 kardemompeule
• 10 ml fyn kaneel
• 20 ml vinkelsaad
• 10 ml fyn koljander
• 5 ml gedroogde brandrissie
• 45 ml olyfolie
• 1 ui, gekap
• 2 knoffelhuisies, gekap
• 8 hoenderstukke sonder vel
• 1 x 400 g-blik tamaties
• sout en varsgemaalde swartpeper
• 100 g groen olywe, ontpit
• amandelvlokkies en koeskoes vir voorsit

Verhit oond tot 180 °C. Maak speserye fyn met ’n stamper en vysel. Verhit olie tot warm in middelslag- oondvaste pot. Voeg ui en knoffel by. Braai 5 minute of tot begin verbruin. Voeg speserymengsel by en braai 2 minute. Plaas hoenderstukke boop speserye en braai tot goudbruin. Draai om en braai nog ’n paar minute tot goudbruin. Voeg tamatie by en geur goed met sout en peper. Sit deksel op en bring tot kookpunt. Verlaag hitte en plaas in oond vir 1 uur of tot vleis van been afval. Voeg olywe by. Sit voor met amandelvlokkies en koeskoes.

The post Stowehoender appeared first on SARIE.

Die lekkerste snit vleis om ’n regte winterkerrie te maak.

genoeg vir 6

• 60 ml botter
• 10 (1,5 kg) lam-kortribbetjies, in helfte gesny
• 60 ml gerookte paprika
• 2 uie, fyngekap
• 2 knoffelhuisies, fyngekap
• 30 ml vinkelsaad
• 45 ml masala
• 2 x 410 g-blikke kersietamaties
• 45 ml bruinsuiker
• 250 ml lamaftreksel
• 250 ml witwyn
• sout en varsgemaalde swartpepepr
• 1 x 400 g-blik botterbone, gedreineer

Verhit oond tot 160 °C. Verhit botter tot warm in middelslagpot. Rol ribbetjies in paprika en plaas met vetkant na onder in warm pot. Braai 8 – 10 minute of tot vet goudbruin is. Verwyder ribbetjies uit pot. Plaas ui, knoffel, vinkel en masala in pot en roerbraai 5 – 8 minute of tot ui begin verbruin.Voeg res van bestanddele by ui en speserye en bring tot kookpunt. Plaas ribbetjies terug in sous vetkant na bo. Geur goed met sout en swartpeper. Maak toe met foelie en plaas in oond vir sowat 1 uur of tot vleis van die been afval. Verwyder uit oond en roer bone by. Sit voor.

The post Ribbetjie-kerrie appeared first on SARIE.

Ja, dié gereg is ’n hele ete op sy eie. Sit dit voor met groenslaai of avokado.

genoeg vir 6

• 12 aartappels
• 60 ml botter
• sout en varsgemaalde swartpeper
• 250 g spek, grofgesny
• 1 ui, in dun ringe gesny
• 100 g parmesaankaas, fyngerasper
• 10 takkies tiemie, fyngekap
• 1 liter room

Verhit oond tot 180 °C. Skil rou aartappels en sny in dun skywe. Smeer ’n oondbraaibak van sowat 40 cm lank met botter. Pak een laag aartappels in bak. Geur met sout en peper. Strooi ’n bietjie spek oor, pak ’n paar uieringe bo-op, sprinkel van die kaas oor en heel laaste van die tiemie. Herhaal die proses tot al die bestanddele gebruik is. Gooi room oor en plaas in warm oond. Bak sowat 90 minute tot aartappels sag is.

The post Romerige aartappelgebak appeared first on SARIE.